Startseite
  Archiv
  Cheryl
  Bilder
  Gästebuch
  Kontakt
 

  Abonnieren
 


http://myblog.de/cheryl

Gratis bloggen bei
myblog.de





Neue Blog

Hallo zämme

 

Mi Vater isch endlich acho!!! Er het e biz verschpötig ka, aber er isch denn doch no cho

 

Mir unternämme jetzt mega viel, sind beidi jede Obe mega mied.

Tuet mir leid, wenn ich zurzyt keini Mails beantwort, aber ich bin halt nie dehaim.

Das isch übrigens min letschte Itrag uf däm Blog gsi. Denn mi Schatz het e neue Blog baschtlet, wo mir ab jetzt werde unseri Iträg schriebe. D Bilder lade mir jetzt au immer dört uffe!

Dr Link isch folgendi:

www.basel-vancouver.ch.vu

 

Au dört cha me dr Blog widr abonniere!

Wünsch Euch allne schöni Wiehnachte!!!

 

Euri Cheryl

18.12.06 04:49


bald isch Wiehnachte!

Hey Zämme!!!

Jetzt isch scho fascht mitti Dezember! Die Zyt vergoht wirklich wie im Flug! Mi Vater chunt scho die Wuche! Am Fritig um genauer zsi :D

 

Mir gohts wirklich mega super! Mini host family het jetzt e Wiehnachtsbaum ufgstellt. Er isch megaaaaaaaaaaaaa amerikanisch!!! Das ka me sich gar nit vorstelle! Muess mol no e Fötteli mache vo däm "wunderschöne" Baum, denn chönnet dir euch selber e Bild mache Er isch absolut überlade mit Dekoration. mit Kugele und Bänder und allem mögliche Kram. S beschti isch denn no, dass e paar Sache rosa sind! Er isch natürlich us Plastik und d Lämpli lüchte in allne Regebogefarbe! So hässlig Ich lieb unsere Wiehnachtsbaum indr Schwyz! Nächscht Johr hilf ich freiwillig mit ufstelle und dekoriere ich vermiss dä typischi Tannegruch, das isch doch eifach e Zeiche für Wiehnachte! Naja, nächscht Johr denn widr

 

Denn hän mir do no e megaaaaaaaaaa Theater ka, will mir e überschwemmti Toilette ka hän. D Toilette isch halt eifach e biz überloffe. Aber will d Hüser halt in Nordamerika eifach alli us Pappe baut sind (us so komischem zämmepampte Holz-Liim Gmisch), het das biz Wassser derzue gfiehrt, dass grad alles Wasser durch d Decki tropft isch und im untere Stock ufs Bett vodr Sherri-Lynn... Do het sie natürlich überhaupt kei Freud ka. Sie het denn d Anne beschuldigt öbbis ins WC gschosse zha und das het halt e mega Stritt gä. Jetzt isch aber alles widr friedlich, d Sache sind gwäsche worde und alli sind fröhlich :D

Hütt het denn mini host family youth group ka, aber stellet euch mol vor um welli Zyt??? Normalerwis isches am Samschtig am 10i am Morge!!! Hütt hän sie no so e spezielli Sitzig ka wäge Wiehnachte, aber trotzdem widr um 10i am Morge! Ich ka das nit verstoh, ich glaub bi uns würde do nitemol d Leiter selber cho

 

mis room mate wird nach de wiehnachtsferie nüm bi mir im Zimmer si. irgendwie find ich s no cool, hoff ich krieg kei Neus , aber anderersits find ich s au schad, denn obwohl sie amme biz närvig gsi isch, ha ich doch no Glück ka mit ihre. Ha jetzt Angscht, dass die Nächschti mega närvig  wird... Naja, mol luege. Dr Grund wieso sie uszieht und in e anderi Familie goht isch mega krass. Sie muess in e Einzelzimmer zieh, da ihre Vater will, dass sie no mehr lernt. Ich mein, sie lernt jetzt scho enorm viel!!! Sie goht jedes Wuchenänd siebe Stund in Bibliothek, denn lernt sie immer no unter Wuche indr Bibliothek und denn lernt sie no am Obe, wenn sie heim chunt! Wirklich krass viel. Und dr Vater verlangt trotzdem no, dass sie mehr lernt... Wo sie mir das gestert verzellt het, het sie mega brielt... Sie tuet mir mega leid...

ich freu mi jetzt mega fescht ufdr bsuech vo mim vater, ha scho e richtige plan ufgstellt :D

 

wünsch euch allne no viel spass bim wiehnachtsgschenkli kaufe!!!

Euri Cheryl

11.12.06 05:39


Mini Wuche

Hallo zämme!!!

Mini Wuche isch ganz schön ufregend gsi :D am letschte wuchenänd hets jo mega fescht gschneit und alles het herrlich usgseh. ich ha mi rächt über dr Schnee gfreut bis am Mittwuch! Denn isch dr Schnee nämlig so richtig närvig worde mir händ do e wunderbare Blizzard ka! Es isch inerhalb vo wenige Stunde iiskalt worde, es isch minus 13 Grad gsi!!! Minus 13!!! es het mega fescht gwindet und gschneit. so siches denn au cho, dass d skytrain nüm gfahre isch... wie scho gsait, wenn s do e biz Schnee het, denn klappt do in Vanopuver gar nüt mehr. Am Mäntig und Zischtig sind sogar alli öffentliche Schuele gschlosse gsi! unvorstellbar, oder?

Also zrug zu dr Skytrain. Ich ha ebbe welle vo dr Schuel heim fahre, aber das isch denn nit gange, da halt ebbe d Skytrain nit gfahre isch, wills zu kalt gsi isch... ich bi also e stund lang andr Skytrain Station gstande, da s immer gheisse heit, dass sie bald widr wird fahre. Irgendwenn isch mir das denn zu blöd worde, dorum bin ich denn in Burger Kind go öbbis ässe. Dört hän mi drei Venezuelaner agschnurt. Ich ha zerschtz e biz angscht ka, da ich halt ganz elai gsi bin und ich nit gwüsst ha, was sie vo mir wänd. Irgendwenn hän sie denn gfunde, ob ich nit mit ihne will e Taxi heim teile nach Burnaby. Mir sind denn also alli vier zämme heim gfahre und es het jede nur 8 Dollar koschtet. Dr Taxifahrer het uns e richtig guete Priis gmacht, will er halt Mitleid mit uns ka het. So sind mir also mitem Taxi durch die leere Strosse vo Vancouver gfahre. Es sind nur Büs und Taxis mit Schneekettene ufdr Stross gsi! ha ich wirklich no nie gseh

Letscht Wuche ha ich denn no e mega Theater ka mit EF. Sie hän mir ebbe indr Schwz gsait, dasses kei Problem isch s Cambridge Exame zmache und dass mit däm Kurs, wo ich buecht ha alles zahlt isch. Das isch aber niteso gsi, dorum ha ich ebbe e Brief gschriebe. Ich krieg jetzt dr Kurs zahlt, cool oder

Hütt ha ich denn no Breakfast mit Santa ka es isch eifach so mega amerikanisch gsi!!! Wie in Hollywood film Es het in sonere Turnhalle stattgfunde. natürlich hets Pancakes gä und nit z vergässe Würschtli derzue. würschtli zum zmorge, eklig, oder? denn hets no Orangesaft usem MCDonalds gä, eifach zu herrlich anschliessend hän mir no alli zämme e Läbkuechemaa dekoriert.
Denn het e Chor no die absolute kitschige Amerikanische Wiehnachtslieder gsunge. isch eifach so herrlich gsi :D Und denn last but not least hän mir alli no Fötteli mitem Santa gmacht! ich lad bald mol bilder uf ringo vo däm typisch amerikansiche Breakfast uffe

juhu, jetzt gohts no zwei wuche, denn chunt mi vater!!! freu mi scho so mega fescht druf!!!

Ich vermiss euch mega fescht!!!

Euri Cheryl

3.12.06 08:41


fötteli vom verschneite vancouver

hey leute

es het widr fötteli vo vancouver uf ringo. leider ha ich s schönschti nit könne föttele: berge mit schnee und vo dr obesunne agstrahlt! eifach megaaaaaaa schön!!!

 

Euri Cheryl 

28.11.06 01:48


schneeeeeeeeeeeeee!!!!!!!!!!!!!!!

bi mir hets hütt sitt gestert zobe (also samschtig zobe) ununterbroche gschneit. es isch alles mega schön wyss und es gseht alles mega schön us :D

es isch aber voll nit kalt, nur grad null grad, dorum isch dr schnee au mega nass, aber gliich es gseht alles himmlisch us :D

do isch winterdienscht aber e fremdwort, dorum hets hütt do in vancouver mega s verkehrschaos gä. es isch ebbe rächt sälte, dasses in vancouver schnee het und denn grad no so viel, dorum hän die meischte autos keini winterreife.

es het jetzt dusse ca. 10 cm schnee und me lauft wirklich im schnee, da kei mensch dr schnee wägschuflet

muess morn mol no paar fötteli mache, damit ihr wüsset, wie schön do alles usgseht :D

 vellecht erläb ich do jo sogar wissi wiehnacht, dermit gsehts jo im momänt indr schwyz nit grad rosig us, ihr häns jo mega warm!

e mega liebe gruess

cheryl 

27.11.06 09:08


fazit vo de zwei monet

hallo zämme!!!

jetzt bin ich scho mehr als zwei monet do!!!

do mol mis fazit

vancouver isch wirklich e hammer stadt!!! d lütt do sin mega fründlich, ans wättr cha me sich wirklich gwöhne, aber sie hän e rächt schlächti wasserversorgig. denn die isch ebbe immer nonig widr repariert mir mien immer no alles wasser kaufe und sogar zähn mit agfülltem wasser putze. mi körper bisst immer, t enn ich bi go dusche, wills wasser eifach so mit chlor versüücht isch. ich muess mi ständig icreme, will s süscht eifach nit zum ushalte isch hoff, dass das bald mol gflickt wird

hütt hets in vancouver gschneit. jetzt gseht alles eifach so mega schön us!!! d stadt isch jetzt no schöner, vor allem, wills jetzt au chli wiehnachtsbelüchtig het. vo dr typisch amerikanerische wiehnachtsbelüchtig isch aber überhaupt nüt zgseh. ich bin fascht echli enttüscht, hoff, dass sie d stadt no chli mehr dekoriere. jetz sind eifach alli laterne mitemene tannekranz gschmuckt und süscht isch nit viel... vellecht sind sie jo nonig fertig mit dekoriere :D

denn d schuel. also dr unterricht isch ganz guet. mir mache viel interaktivs züg und kommunikation stoht im fordergrund. ich finds no cool, denn so goht me wirklich gern ind schuel. in mim neue level muess ich jedi wuche e ufsatz schriebe. das find ich no guet, da ich halt eifach so mega schlecht uf englisch schrieb. ich ha aber au e paar schlecht sache indr schuel, aber das isch nur näbesächlich. ich ha scho viel glernt, das merk ich vor allem, wenn ich film lueg oder biecher lies. ich ka jetzt au scho ferneseh luege und abglänkt si und ich verstands trotzdem no.

denn mini host family. ich chum immer no mega guet mit ihne us, bi mega froh do z wohne. aber ebbe nach zwei monet isch falle eim ebbe scho paar sache uf. zum bispiel läb ich jo do mit zwei buebe, also ein isch siebe und dr andere isch eins. die zwei werde eifach so miserabel erzoge. d sherri-lynn (also d muetter) sött vellecht mol "die super-nanny" luege. sie seit ihrem sohn (er heisst isaiah) mega oft, dass er am morge ufwacht und denn isch sie nüm do und dass er sie mega ufregt und dass sie ihn hasst. also mega krass, so mega fies. dr bueb benimmt sich denn au no so, also er macht mega viel seich und versuecht halt so ufmerksamkeit z erlange. d welt drüllt sich aber nur um dr eijöhrigi (dä heisst justus). dö ka sich kei sekunde elai beschäftige und wenn sich nit irgendöbber mit ihm beschäftigt, denn brielt er ständig. ich ha no nie in mim läbe e baby erläbt wo so viel brielt.

das wuchenänd isch d family aber nit do, dorum hän mir unseri rueh und sind jetzt mol e weekend ohni babygschrei :D

süscht isch d family aber mega cool!!! s ässe isch eifach hammer und d family isch mega nätt zu uns. mir chönne eigentlich mache, was mir wän, aber trotzdem sind sie halt do. das isch mega cool!!!

denn zu mine mitbewohnerinne. mit mim room mate chum ich nüm so hammer guet us. sie isch eifach amme biz miehsam. ihr englisch isch ebbe mega miehsam, sie chas aber nit zugäh. dorum seit ihr amme d lenn ( das isch mini mother), dass sie öbbis mache söll oder mir usrichte söll. sie seit denn ok, het aber kei wort verstande... das isch amme chli miehsam. sie stoht au no am weekend immer am halb nüüni uf. aber nit eifach so, sondern mitemene wecker, wo zäh minute schällt. aber süscht isch sie eigentlich mega ok. denn d anne (us holland), sie gseh ich eigentlich nie, da sie mega viel unterwegs isch. wenn ich gseh, denn verstand ich mi aber guet mit ihre. sie isch halt so e richtigs party-girl und het au scho die eint oder anderi männlichi bekanntschaft gmacht mit dr hanna chum ich vo mine mitbewohnerinne eigentlich am beschte us. sie isch e mega liebi und ich has wirklich guet mit ihre. mir esse au fascht immer zämme znacht. sie isch mega cool und au mega witzig.

 

denn d gmeind. das isch ebbe so e sach gsi. ich ha jo mega lang gmeind gfunde. ha mi denn mega gfreut, wo ich endlich d broadway church gfunde ha. dört hets ebbe am donschtig zobe gottesdienscht für 18-30 jährigi und am sunntig am elfi e normale gottesdienscht. am donschtig dä isch mehr so chli huskreis-mässig und sehr uf gmeinschaft usglegt. dä am morge isch halt so e mischig zwüsche 7ab7 und morgegottesdienscht. es isch e rächt e grossi kirche und ich find sie mega lässig.

 

so, mir gohts also mega guet, ich ha mi so richtig igläbt!!! mi vater chunt au scho bald, scho in zweiehalb wuche!!! ich freu mi scho mega druf, halt endlich widr öbber vertrauts us dr schwyz!!! freu mi so mit ihm wiehnacht z fyre!

freu mi au immer mega über mails vo euch, so weiss ich, wies euch so goht! das isch nämlich unfair, wenn ihr immer wüsset, wie s mir so goht, aber ich kei plan ha, was ihr so machet

bald chunt denn au scho dr thomas :D

die nächschti zyt wird also au mega schnell verbi go. bald chutn mi vater, denn chunt dr thomas und denn isch scho januar!!!

vermiss euch natürlich immer no mega fescht!!! denn au wenn ich do mega viel nätti lütt kenneglernt ha, sind die halt nit ihr!!! die kenni mi halt niteso guet wie ihr!!!

Euri Cheryl

26.11.06 07:10


Scho fascht zwei Monet do!!!

Sali zämme!!!

 

Jetzt bin ich scho fascht zwei Monet do!!! Die Zyt isch eigentlich rächt schnell verbi gange!!! Vor allem die letschte paar Wuche sind im Nu verbi gsi! Jetzt, wo ich halt so chli Alltag ha, gohts eigch abartig schnell bis widr e Wuche verbi isch!

 Also, mol zu minre Wuche

ich bi jetzt imene neue Level!!! Mi Lehere isch am Mäntig eifach so cho und het gfunde: "Cheryl, du hesch e neue Stundeplan, du bisch im Level 7". bi mega überrascht gsi, will er mi halt eifach mol vo e paar Wuche gfrogt het, ob ich denn Mol möcht wächsle, denn het er aber nix meh gsait. ich ha denn dänkt, ich blib jetzt in däm Level bis zu de Wiehnachtsferie, aber das isch wohl niteso gsi jetzt bin ich ebbe im Level 7. Es isch also viel aspruchsvoller also s Level 6. Mi alte Lehrer het halt die ganzi Zyt mega viek Witz gmacht und mir hän immer so blödi Spieli gmacht (also e Umschlag mitemene Wort und du muesches pantomimisch darstelle oder Wörter und du muesches Wortgruppene zueordne). In mim neue Level lerne mir halt eifach so ufbauendi Sache. Also es wird zum Bispiel eifach d Grammatik wittergfiehrt, also so Usnahme oder so. Und denn lerne mir au chli "Slang" rede. Nit wirklich aber ämmel biz. das find ich no cool nächschz Wuche luege mir au no chli d SMS-Sproch ah, denn me muess scho wüsse, wases so für abkürzige git, süscht verstoht me s ächt nit!!! ich fühl mi also wohl in däm Level und bi jetzt au rächt gforderet.

Am Mittwuch hets bi uns e rächts Unwetter ka. Es het mega fescht grägnet und gstürmt. Isch no krass gsi!!! D Strosse do sind halt alli so gwölbt baut, wills halt eifach immer rächt viel rägnet. Am Rand, also vorem Trottoir, hets denn Knöcheltiefi Pfützene ka. Wenn denn d Autos verbi gfahre sind, hets s Wasser hüfthoch gschprützt und uf e Enternig vo ca. einehalb Meter. Wenn me also über d Stross het welle, het me in sicherer Entfernig miesse warte. Vom Trottoir uf d Stross zcho isch denn au no e rächti Herusforderig gsi, da halt s Wasser am Rand rächt tief gsi isch. Do het me halt miesse Wittsprung mache isch no amüsant gsi, so Gschäftslütt und mega Tussene am Wittschprung mache

 Dä Sturm und Räge het aber no chli negativi Folge ka, denn d Wasserversorgig isch zämme broche... S Meer isch halt mega ufgwiehlt gsi und au chli überschwemmt, das heisst Salzwasser isch ind Wasseranlage gloffe, denn het dr Sturm no d Wasseralag licht beschädigt und dr Räge het denn no die ganzi Alag vo Obe mit Wasser tränkt. Jetzt dörfe mir e paar Wuche lang kei Hahnewasser mehr trinke. Am Donschtig Nomittag isch s Wasser usem Hahne so richtig bruun gsi. Rächt eklig

Am DOnschtig Zobe bin ich denn in däm Gottesdienscht gsi. Diesmol isch so gmeinsams Znachtässe gsi ohni Predigt. Ich ha eigentlich mit einre zämme welle go, aber sie het denn irgendwie nit könne. Ich bi denn niteso lang bliibe, will sich halt alli lenn hän und ich denn au kei Luscht me ka ha jetzt gang ich mol morn am Morge nomol.

 

süscht gohts mir au super, freu mi mega uf dr Bsuech vo mim vater!!! s goht nu no vier Wuche und ich ha endlich Ferie :D

 E mega liebe Gruess us Vancouver!!!

Euri Cheryl
 

18.11.06 19:58


 [eine Seite weiter]



Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung