Startseite
  Archiv
  Cheryl
  Bilder
  Gästebuch
  Kontakt
 

  Abonnieren
 


http://myblog.de/cheryl

Gratis bloggen bei
myblog.de





mis room mate

Hallo zämme!

ich bin widr ganz gsund und mir gohts widr super.

bi uns isch au herrlichs wätter, d sunne schiint jetzt scho sitt drei täg!!! also dochnix mit drmega schlimme rägesaison :D defür isches jetzt so richtig kalt worde. aber ich ha ghört, dass stoht euch jo jetzt au no bevor

mit mim room mate verstand ich mi wirklich immer besser. ich weiss jetzt gar nit, was ich alles scho mol gschriebe ha, dorum schrieb ich eifach alles nomol

am afang isch sie jo megaaaaaaaa schüch gsi und ihr änglisch isch e katastrophe gsi. do ha ich scho dänkt dänkt, das wird jo super mit däre im zimmer... aber denn het sie ihri scheu ablegt und ihr englisch wird vo wuche zu wuche besser (sie goht ebbe jedes wuchenänd ind bibliothek go lerne, aber nit nur ei, zwei stund, sondern je siebe an beidne täg!!!). ämel merkt me das halt und ich ka scho richtig mit ihre schwätze. wenn mir uns nit verstöhn, denn molt sie halt, das isch amme rächt amüsant

am afang isch sie ebbe immer ins badzimmer gange zum sich go umzieh und isch mol mega gschockt gsi, wo ich nur mitemene tiechli verhüllt usem bad cho bin. jetzt het sich das aber gänderet. sie zieht sich jetzt au im zimmer um

au körperkontakt isch mittlerwile erlaubt, aber halt niteso wie bi uns. letschti sich sie aber mega happy gsi, do het sie mi soagr in amr gno! bi selber ganz verdutzt gsi, aber ich finds cool denn gestert het sie sich so richtig bi mir usghült, will sie halt nüm mag so viel lerne und will sie in de wiehnachtsferie drei wuche nach japan muess, aber viel lieber würd do bliibe. ich ha sie denn tröschtet. ha mi aber nit getraut sie in arm znäh, da sie mir ebbe verzellt ka het, dass kinder in japan wo briele nit beachtet werde (also scho gar nit in arm gno werde). ich ha denn beschlosse, dass ich ihr händ tätschle und sie chli am arm heb, das muess länge

denn het sie mir nacher no gsait, dass sie mi mega wird vermisse in de wiehnachtsferie. sie will mi sogar ind schwyz cho bsueche, will sie mi widr möcht gseh.

am sunntig chunt sie mit ind kirche. sie isch gschpannt, wie das dört so isch und ich ha halt so chli verzellt und sie möcht das jetzt erläbe. das find ich natürlich mega cool!!!

süscht, ich mach bald e paar fötteli uf ringo, bi uns isch jo halloween gsi ich ha au ganz viel fötteli vodr schuel gmacht, damit ihr mol e idruck bechömet, wie ich do so ind schuel gang (ganz speziell für di paps )

so, das wärs vo mir, e schöne tag no und lönd euch vom winter nit deprimiere

 

euri Cheryl

1.11.06 00:55


Kirche gfunde

Hallo zämme

 Jetzt ha ich endlich e Kirche gfunde, wo ich wirklich hammer cool find!!! Ich find sie nit nur ok, sondern mega lässig!

Bi hüt am Morge zum erschte Mol gsi. Dr Gottesdienscht isch no rächt cool gsi, allerdings isch dr Preacher echli speziell gsi. Er isch ebbe do gsi zum si Buech z promote das isch halt niteso lässig gsi. Aber dr Worship isch cool gsi und d Stimmig und halt eifach alles.

Nachem Gottesdienscht het mi denn e relativ Junge agschproche und gfrogt, wieso ich denn scho wach sig und denn erscht no indr kirche. denn eigentlich würde alli Junge immer am Morge go. Er sig nur do, will er ebbe e Job ka hätti am Morge. Er het mir denn ebbe verzellt, dass er dä Preacher au niteso hammer gfunde het, was mi doch no mehr begeischteret het vo däre church!

Er het mi denn iglade am donschtig an so e youth praise obe zgo für 18 bis 30 jährigi. das isch jede Donschtig und sig eher öbbis für mi, het er gmeint Er het mir denn au no abotte mi dehaim abzhole mitem auto. wo ich denn gsait ha, wo ich wohn, het er zwar chli gschtutzt, sich halt scho no witt wäg, aber er holt mi gliich ab  

jetzt gang ich also immer am 18:30 Uhr am Sunntig in die kriche, denn sie hän au Obegottesdienscht, was mir natürlich sehr zuesait :D

Mim room mate hets eigentlich no gfalle, sie het nur eifach überhaupt nix verstande, das isch chli blöd. aber dr preacher het e nur über sie buech gschwaflet, dorum isch das niteso schlimm gsi sie het aber gfunde, sie chunt jetzt jede sunntig am obe mit, da sie s no cool findet und mehr über s christetum erfahre will :D das het mi natürlich gfreut!

 Merci vielmol, für euri Hilf!!! bi wirklich mega froh, ha ich jetzt e gmeind gfunde!

Süscht gohts mir eigentlich au super!!!

Euri Cheryl 

6.11.06 05:23


Scho widr e Wuche verbi

Hallo zämme

D zyt do goht echt megaaaaa schnell verbi!!! Tuet mir leid, dass ich nüm so oft schrieb, aber ich mekrs amme gar nit und schwups isch scho widr e Wuche verbi!

Ich fühl mi do eifach immer no mega wohl, gniesses wirklich do zsi, au wenn mir s Wetter nit immer eso zuesait. Dä vieli Räge find ich halt scho nit gradeso dr Hammer, aber jo, das isch jo nur e kleins Detail

Mini Gastfamilie find ich immer no nett und mit mim room mate chum ich eigentlich au immer no guet us. Sie nervt mi halt amme chli, aber das isch jo normal. Sie stoht ebbe am Morge immer mega frieh uf und denn isch sie nit grad lislig, sondern rächt lutt, so dass ich am Wuchenänd immer nätterwys am schpöteschtens nüüni gweckt wird... und das, obwohl ich s über alles lieb lang zschloofe... naja, in de Winterferie isch sie aber zum Glück nit do, denn cha ich wenigschtens denn usschlofe :D

Am Donschtig bin ich nomol indr Kirche gsi. Es isch mega lässig gsi, es isch halt so e Art Gottesdienscht gsi, aber nit eso wie bi uns. Es sind alli an runde Tisch gsässe und denn hets zerscht mol e Stund worship gä. Danach hän denn so Missionare gschwätzt, isch no cool gsi. Sie hän aber immer nur so zäh Minute predigt, denn hän mir am Tisch chönne mitenand diskutiere, denn isch ustuscht worde und denn het er no öbbis derzue gsait. So isches so chli Huskreismässig gsi. Ha das rächt cool gfunde und wird wohl in Zuekunft jede Donschtig go.

Hütt Zobe ha ich eigentlich au nomol indr Kirche welle go, will mir halt dr einti gsait het, dass ich entweder am Obe oder am Donschtig söll go. Ich bi also hütt gsi und das isch kei Gottesdienscht gsi, sondern e Bett-Session... da ich niteso fan bin vo däm, ha ich mi denn rächt schnell widr verzüpft aber ich gang jo jetzt immer am Donschtig, vo däm her, muess ich am Sunntig am Morge jo nit go

Süscht gits bi mir eigentlich niteso viel Neus, usser dasses nur no ei Monet goht, bis ich mi erschte Bsuech bechum und nur no einehalb Monet bis mi Schatz endlich chunt :D

Bi uns isch irgendwie no gar kei Wiehnachtsstimmig, no kei Wiehnachtsdeko oder süscht irgendöbbis. Das überrascht mi doch rächt, freu mi ebbe mega druf, Vancouver mit Wiehnachtsbelüchtig zgseh :D aber jo, dass chunt jo denn no. Öbbis wo mi mini Gastfamilie verzellt het, het mi grad echli schockiert: sie backe keini richtige Wiehnachtsguetzelii!!! ha dänkt ich hörs nüm... sie mache nur so paar Gutzelli, aber nit unseri typische Wienachtsgutzelli... Wenn also öbber vo euch per Zuefall luscht het zum Wiehnachtsgutzelli backe, denn chönnet dir sie vo Härze gern mim Vater mitgäh :D

Also, das wars vo mir usem verrägnete Vancouver 

Euri Cheryl 

13.11.06 05:47


Scho fascht zwei Monet do!!!

Sali zämme!!!

 

Jetzt bin ich scho fascht zwei Monet do!!! Die Zyt isch eigentlich rächt schnell verbi gange!!! Vor allem die letschte paar Wuche sind im Nu verbi gsi! Jetzt, wo ich halt so chli Alltag ha, gohts eigch abartig schnell bis widr e Wuche verbi isch!

 Also, mol zu minre Wuche

ich bi jetzt imene neue Level!!! Mi Lehere isch am Mäntig eifach so cho und het gfunde: "Cheryl, du hesch e neue Stundeplan, du bisch im Level 7". bi mega überrascht gsi, will er mi halt eifach mol vo e paar Wuche gfrogt het, ob ich denn Mol möcht wächsle, denn het er aber nix meh gsait. ich ha denn dänkt, ich blib jetzt in däm Level bis zu de Wiehnachtsferie, aber das isch wohl niteso gsi jetzt bin ich ebbe im Level 7. Es isch also viel aspruchsvoller also s Level 6. Mi alte Lehrer het halt die ganzi Zyt mega viek Witz gmacht und mir hän immer so blödi Spieli gmacht (also e Umschlag mitemene Wort und du muesches pantomimisch darstelle oder Wörter und du muesches Wortgruppene zueordne). In mim neue Level lerne mir halt eifach so ufbauendi Sache. Also es wird zum Bispiel eifach d Grammatik wittergfiehrt, also so Usnahme oder so. Und denn lerne mir au chli "Slang" rede. Nit wirklich aber ämmel biz. das find ich no cool nächschz Wuche luege mir au no chli d SMS-Sproch ah, denn me muess scho wüsse, wases so für abkürzige git, süscht verstoht me s ächt nit!!! ich fühl mi also wohl in däm Level und bi jetzt au rächt gforderet.

Am Mittwuch hets bi uns e rächts Unwetter ka. Es het mega fescht grägnet und gstürmt. Isch no krass gsi!!! D Strosse do sind halt alli so gwölbt baut, wills halt eifach immer rächt viel rägnet. Am Rand, also vorem Trottoir, hets denn Knöcheltiefi Pfützene ka. Wenn denn d Autos verbi gfahre sind, hets s Wasser hüfthoch gschprützt und uf e Enternig vo ca. einehalb Meter. Wenn me also über d Stross het welle, het me in sicherer Entfernig miesse warte. Vom Trottoir uf d Stross zcho isch denn au no e rächti Herusforderig gsi, da halt s Wasser am Rand rächt tief gsi isch. Do het me halt miesse Wittsprung mache isch no amüsant gsi, so Gschäftslütt und mega Tussene am Wittschprung mache

 Dä Sturm und Räge het aber no chli negativi Folge ka, denn d Wasserversorgig isch zämme broche... S Meer isch halt mega ufgwiehlt gsi und au chli überschwemmt, das heisst Salzwasser isch ind Wasseranlage gloffe, denn het dr Sturm no d Wasseralag licht beschädigt und dr Räge het denn no die ganzi Alag vo Obe mit Wasser tränkt. Jetzt dörfe mir e paar Wuche lang kei Hahnewasser mehr trinke. Am Donschtig Nomittag isch s Wasser usem Hahne so richtig bruun gsi. Rächt eklig

Am DOnschtig Zobe bin ich denn in däm Gottesdienscht gsi. Diesmol isch so gmeinsams Znachtässe gsi ohni Predigt. Ich ha eigentlich mit einre zämme welle go, aber sie het denn irgendwie nit könne. Ich bi denn niteso lang bliibe, will sich halt alli lenn hän und ich denn au kei Luscht me ka ha jetzt gang ich mol morn am Morge nomol.

 

süscht gohts mir au super, freu mi mega uf dr Bsuech vo mim vater!!! s goht nu no vier Wuche und ich ha endlich Ferie :D

 E mega liebe Gruess us Vancouver!!!

Euri Cheryl
 

18.11.06 19:58


fazit vo de zwei monet

hallo zämme!!!

jetzt bin ich scho mehr als zwei monet do!!!

do mol mis fazit

vancouver isch wirklich e hammer stadt!!! d lütt do sin mega fründlich, ans wättr cha me sich wirklich gwöhne, aber sie hän e rächt schlächti wasserversorgig. denn die isch ebbe immer nonig widr repariert mir mien immer no alles wasser kaufe und sogar zähn mit agfülltem wasser putze. mi körper bisst immer, t enn ich bi go dusche, wills wasser eifach so mit chlor versüücht isch. ich muess mi ständig icreme, will s süscht eifach nit zum ushalte isch hoff, dass das bald mol gflickt wird

hütt hets in vancouver gschneit. jetzt gseht alles eifach so mega schön us!!! d stadt isch jetzt no schöner, vor allem, wills jetzt au chli wiehnachtsbelüchtig het. vo dr typisch amerikanerische wiehnachtsbelüchtig isch aber überhaupt nüt zgseh. ich bin fascht echli enttüscht, hoff, dass sie d stadt no chli mehr dekoriere. jetz sind eifach alli laterne mitemene tannekranz gschmuckt und süscht isch nit viel... vellecht sind sie jo nonig fertig mit dekoriere :D

denn d schuel. also dr unterricht isch ganz guet. mir mache viel interaktivs züg und kommunikation stoht im fordergrund. ich finds no cool, denn so goht me wirklich gern ind schuel. in mim neue level muess ich jedi wuche e ufsatz schriebe. das find ich no guet, da ich halt eifach so mega schlecht uf englisch schrieb. ich ha aber au e paar schlecht sache indr schuel, aber das isch nur näbesächlich. ich ha scho viel glernt, das merk ich vor allem, wenn ich film lueg oder biecher lies. ich ka jetzt au scho ferneseh luege und abglänkt si und ich verstands trotzdem no.

denn mini host family. ich chum immer no mega guet mit ihne us, bi mega froh do z wohne. aber ebbe nach zwei monet isch falle eim ebbe scho paar sache uf. zum bispiel läb ich jo do mit zwei buebe, also ein isch siebe und dr andere isch eins. die zwei werde eifach so miserabel erzoge. d sherri-lynn (also d muetter) sött vellecht mol "die super-nanny" luege. sie seit ihrem sohn (er heisst isaiah) mega oft, dass er am morge ufwacht und denn isch sie nüm do und dass er sie mega ufregt und dass sie ihn hasst. also mega krass, so mega fies. dr bueb benimmt sich denn au no so, also er macht mega viel seich und versuecht halt so ufmerksamkeit z erlange. d welt drüllt sich aber nur um dr eijöhrigi (dä heisst justus). dö ka sich kei sekunde elai beschäftige und wenn sich nit irgendöbber mit ihm beschäftigt, denn brielt er ständig. ich ha no nie in mim läbe e baby erläbt wo so viel brielt.

das wuchenänd isch d family aber nit do, dorum hän mir unseri rueh und sind jetzt mol e weekend ohni babygschrei :D

süscht isch d family aber mega cool!!! s ässe isch eifach hammer und d family isch mega nätt zu uns. mir chönne eigentlich mache, was mir wän, aber trotzdem sind sie halt do. das isch mega cool!!!

denn zu mine mitbewohnerinne. mit mim room mate chum ich nüm so hammer guet us. sie isch eifach amme biz miehsam. ihr englisch isch ebbe mega miehsam, sie chas aber nit zugäh. dorum seit ihr amme d lenn ( das isch mini mother), dass sie öbbis mache söll oder mir usrichte söll. sie seit denn ok, het aber kei wort verstande... das isch amme chli miehsam. sie stoht au no am weekend immer am halb nüüni uf. aber nit eifach so, sondern mitemene wecker, wo zäh minute schällt. aber süscht isch sie eigentlich mega ok. denn d anne (us holland), sie gseh ich eigentlich nie, da sie mega viel unterwegs isch. wenn ich gseh, denn verstand ich mi aber guet mit ihre. sie isch halt so e richtigs party-girl und het au scho die eint oder anderi männlichi bekanntschaft gmacht mit dr hanna chum ich vo mine mitbewohnerinne eigentlich am beschte us. sie isch e mega liebi und ich has wirklich guet mit ihre. mir esse au fascht immer zämme znacht. sie isch mega cool und au mega witzig.

 

denn d gmeind. das isch ebbe so e sach gsi. ich ha jo mega lang gmeind gfunde. ha mi denn mega gfreut, wo ich endlich d broadway church gfunde ha. dört hets ebbe am donschtig zobe gottesdienscht für 18-30 jährigi und am sunntig am elfi e normale gottesdienscht. am donschtig dä isch mehr so chli huskreis-mässig und sehr uf gmeinschaft usglegt. dä am morge isch halt so e mischig zwüsche 7ab7 und morgegottesdienscht. es isch e rächt e grossi kirche und ich find sie mega lässig.

 

so, mir gohts also mega guet, ich ha mi so richtig igläbt!!! mi vater chunt au scho bald, scho in zweiehalb wuche!!! ich freu mi scho mega druf, halt endlich widr öbber vertrauts us dr schwyz!!! freu mi so mit ihm wiehnacht z fyre!

freu mi au immer mega über mails vo euch, so weiss ich, wies euch so goht! das isch nämlich unfair, wenn ihr immer wüsset, wie s mir so goht, aber ich kei plan ha, was ihr so machet

bald chunt denn au scho dr thomas :D

die nächschti zyt wird also au mega schnell verbi go. bald chutn mi vater, denn chunt dr thomas und denn isch scho januar!!!

vermiss euch natürlich immer no mega fescht!!! denn au wenn ich do mega viel nätti lütt kenneglernt ha, sind die halt nit ihr!!! die kenni mi halt niteso guet wie ihr!!!

Euri Cheryl

26.11.06 07:10


schneeeeeeeeeeeeee!!!!!!!!!!!!!!!

bi mir hets hütt sitt gestert zobe (also samschtig zobe) ununterbroche gschneit. es isch alles mega schön wyss und es gseht alles mega schön us :D

es isch aber voll nit kalt, nur grad null grad, dorum isch dr schnee au mega nass, aber gliich es gseht alles himmlisch us :D

do isch winterdienscht aber e fremdwort, dorum hets hütt do in vancouver mega s verkehrschaos gä. es isch ebbe rächt sälte, dasses in vancouver schnee het und denn grad no so viel, dorum hän die meischte autos keini winterreife.

es het jetzt dusse ca. 10 cm schnee und me lauft wirklich im schnee, da kei mensch dr schnee wägschuflet

muess morn mol no paar fötteli mache, damit ihr wüsset, wie schön do alles usgseht :D

 vellecht erläb ich do jo sogar wissi wiehnacht, dermit gsehts jo im momänt indr schwyz nit grad rosig us, ihr häns jo mega warm!

e mega liebe gruess

cheryl 

27.11.06 09:08


fötteli vom verschneite vancouver

hey leute

es het widr fötteli vo vancouver uf ringo. leider ha ich s schönschti nit könne föttele: berge mit schnee und vo dr obesunne agstrahlt! eifach megaaaaaaa schön!!!

 

Euri Cheryl 

28.11.06 01:48





Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung